वाशिम-अकोला मार्गे नांदेड-कुर्ला रेल्वे सेवा तात्काळ सुरू करण्याची खासदार संजय देशमुख यांची संसदेत जोरदार मागणी

माजी राज्यमंत्री संजय देशमुख यांची मागणी, अन्यथा तीव्र आंदोलनाचा दिला इशारा

आज यवतमाळ वाशिम लोकसभेचे खासदार मा.संजय देशमुख साहेब यांनी संसदेत नांदेड ते कुर्ला मार्गे वाशिम–अकोला या नव्या रेल्वे सेवेसंदर्भात अत्यंत महत्त्वाचा मुद्दा जोरदारपणे मांडला.त्यांनी सांगितले की, 29 ऑगस्ट 2023 रोजी केंद्रीय रेल्वे मंत्रालय व रेल्वे बोर्ड यांनी नांदेड–कुर्ला व्हाया वाशिम–अकोला या स्थायी रेल्वेगाडीला औपचारिक मंजुरी दिली होती. 17665/66 आणि 17667/68 अशा क्रमांकाने मंजूर झालेली ही सेवा वाशिम जिल्ह्यासाठी अत्यंत उपयुक्त ठरणार होती.

नवी दिल्ली : यवतमाळ-वाशिम लोकसभेचे खासदार मा. संजय देशमुख यांनी आज लोकसभेत वाशिम जिल्ह्याच्या दीर्घकाळ प्रलंबित असलेल्या रेल्वे सेवेसंदर्भात ठोस आणि मुद्देसूद भूमिका मांडली. नांदेड-कुर्ला मार्गे वाशिम-अकोला अशी नवी रेल्वे सेवा २९ ऑगस्ट २०२३ रोजी केंद्रीय रेल्वे मंत्रालय व रेल्वे बोर्ड यांनी अधिकृतरीत्या मंजूर केली तरीही, दोन वर्षांहून अधिक काळ सेवा प्रत्यक्षात सुरू न झाल्याबद्दल त्यांनी तीव्र नाराजी व्यक्त केली. 17665/66 आणि 17667/68 या क्रमांकांनी मंजूर झालेली ही रेल्वे सेवा वाशिम जिल्ह्यासाठी अत्यंत महत्त्वपूर्ण असल्याचे त्यांनी सभागृहात अधोरेखित केले. वाशिम हा आकांक्षित जिल्हा असल्याने विकासाच्या प्रत्येक संधीचे महत्त्व अधिक आहे आणि रेल्वे सेवेत झालेल्या विलंबामुळे नागरिकांना मोठ्या गैरसोयींचा सामना करावा लागत असल्याचे त्यांनी स्पष्ट केले. मुंबईकडे वाशिम जिल्ह्यातून एकही थेट रेल्वे सेवा उपलब्ध नसल्यामुळे विद्यार्थी, रुग्ण, कामगार, व्यापारी अशा प्रवाशांना प्रवासात प्रचंड अडचणींचा सामना करावा लागत असल्याचे त्यांनी सांगितले. ही नवीन रेल्वे सेवा सुरू झाल्यानंतर प्रवास अधिक जलद, सुरक्षित आणि सोयीस्कर होईल. तसेच, वाशिम, अकोला आणि परिसरातील स्थानकांवर आवश्यक सुविधा विकसित होऊन स्थानिक युवकांसाठी रोजगारनिर्मितीच्या नव्या संधीही निर्माण होतील, असे त्यांनी अधोरेखित केले.